Tiranë – Foshnja humb jetën gjatë lindjes, nën akuzë dy gjinekologë të maternitetit “Koço Gliozheni”

Prokuroria pranë Gjykatës së Shkallës së Parë në Tiranë ka përfunduar hetimet dhe ka marrë të pandehur dy mjekë gjinekologë të maternitetit “Koço Gliozheni”, me inicialet E.V. dhe A.H., të cilët akuzohen për veprën penale “Neglizhenca në trajtimin mjekësor”.

Hetimet u nisën pas kallëzimit të bërë nga A.Z., e cila humbi foshnjën e saj gjatë procesit të lindjes. Sipas aktit të ekspertimit mjeko-ligjor, vdekja e foshnjës ka ardhur si pasojë e dëmtimeve të rënda të shkaktuara gjatë përdorimit të forcepsit, një instrument obstetrik që përdoret kur lindja natyrale ngec ose kur ndërhyrja kirurgjikale vonohet.

Ekspertiza thekson se dëmtimet nuk kanë qenë rezultat i një komplikacioni të paparashikueshëm, por pasojë e mungesës së ndërhyrjes në kohë, e cila, sipas mjekëve ligjorë, do të kishte shmangur përdorimin e forcepsit nëse lindja do të ishte kryer me operacion cezarian, siç ishte planifikuar fillimisht.

Prokuroria pritet t’ia përcjellë dosjen Gjykatës për shqyrtim, ndërsa të dy mjekët do të përballen me drejtësinë për të dhënë llogari lidhur me rastin tragjik që ka tronditur opinionin publik.