Suedia – Kosova, sfidë vendimtare në Göteborg për Botërorin 2026
Kombëtarja e Kosovës sonte zhvillon ndeshjen e dytë të muajit tetor, ku takohet me Kombëtaren e Suedisë në stadiumin Nya Ullevi në Göteborg, me fillim nga ora 20:45. Në ndeshjen e parë të zhvilluar në Prishtinë, Kosova arriti fitore të madhe ndaj Suedisë me rezultat 2-0 dhe tani kërkon të përsërisë suksesin edhe në transfertë.
Kosova ndodhet aktualisht në vendin e dytë të Grupit B me katër pikë, ndërsa Suedia renditet e fundit me vetëm një pikë. Të dyja skuadrat kanë zhvilluar nga tri ndeshje dhe kjo përballje pritet të jetë vendimtare për vazhdimin e garës në kualifikimet e Botërorit 2026.
Trajneri Franco Foda ka zbuluar formacionin startues ku ka bërë disa ndryshime krahasuar me sfidën ndaj Sllovenisë. Në portë luan Aro Muriç, mbrojtja udhëhiqet nga Amir Rrahmani dhe Fidan Aliti, ndërsa në sulm do të jenë Vedat Muriqi dhe Fisnik Asllani.
Atmosfera në Göteborg pritet të jetë e jashtëzakonshme pasi kjo është hera e parë pas 16 vjetësh që Suedia luan një ndeshje kualifikuese në stadiumin Nya Ullevi. Ndeshja Suedia – Kosova do të transmetohet drejtpërdrejt në RTK dhe në platformat ndërkombëtare sportive ViX dhe Fubo Sports.
Kosova kërkon të vazhdojë serinë pozitive dhe të mbajë gjallë ëndrrën e madhe për pjesëmarrje në Botërorin 2026, ndërsa Suedia do të kërkojë rikthimin në formë dhe hakmarrjen pas humbjes në Prishtinë.
About The Author
