Prishtinë – Kryeministri në detyrë i Kosovës, Albin Kurti, ka ushtruar të drejtën e votës rreth orës 9:00 të mëngjesit, në një qendër votimi në Prishtinë, në kuadër të zgjedhjeve lokale që po mbahen sot në gjithë vendin.
Pas hedhjes së votës, Kurti iu drejtua gazetarëve dhe u bëri thirrje të gjithë qytetarëve, pa dallim etnie apo përkatësie politike, që të marrin pjesë në procesin zgjedhor dhe të kontribuojnë në zhvillimin e komunave të tyre.
“Votojmë për të vendosur për katër vjetët e ardhshëm në komunat tona. Përveçse qytetarë të Republikës së Kosovës, jemi edhe banorë të komunës. Ftoj të gjithë qytetarët ta shfrytëzojnë të drejtën, të bëhen hisedarë në zgjidhjen e problemeve që kanë,”
– deklaroi Kurti.
Kryeministri në detyrë dha mesazhin e tij edhe në gjuhën serbe dhe atë angleze, duke theksuar rëndësinë e pjesëmarrjes gjithëpërfshirëse dhe demokratike në zgjedhje.
Procesi i votimit në Kosovë po vijon me hapjen e qendrave të votimit në orën 7:00 të mëngjesit dhe do të mbyllet në orën 19:00.
About The Author
