Gjykata e Tiranës shpall vendimin për motrat Berisha: 3 vite burg dhe shërbim prove për dhunën ndaj Klea Prengës
Gjykata e Tiranës ka shpallur sot vendimin për çështjen e shumëpërfolur të motrave Mariela dhe Antonela Berisha, të akuzuara për dhunë fizike ndaj blogeres Klea Prenga, një ngjarje që tronditi opinionin publik në gusht të vitit 2024.
Sipas vendimit gjyqësor, Mariela Berisha u dënua me 3 vite burg, por dënimi iu reduktua në 2 vite, për shkak të pranimit të gjykimit të shkurtuar. Ndërsa Antonela Berisha u dënua me 3 vite shërbim prove, të cilat po ashtu u reduktuan në 2 vite me të njëjtin mekanizëm lehtësues.
Ngjarja ndodhi në një nga restorantet e Tiranës, ku sipas dosjes hetimore, Klea Prenga u sulmua fizikisht dhe u godit me sende të forta gjatë një darke. Sherri dyshohet se nisi për arsye personale, pasi blogerja shoqërohej me ish-partnerin e Marielës — një motiv që më vonë u cilësua nga organet hetimore si “motive banale”.
Pas incidentit, motrat Berisha u shpallën në kërkim policor, ndërsa u vetëdorëzuan në komisariat pas rreth dy muajsh. Procesi gjyqësor ndaj tyre ka zgjatur disa muaj dhe është ndjekur gjerësisht nga media dhe rrjetet sociale, për shkak të profilit publik të të përfshirave.
Sipas burimeve pranë gjykatës, vendimi nuk është ende përfundimtar dhe palët kanë të drejtë ta apelojnë në Gjykatën e Apelit të Tiranës në ditët në vijim.
Ngjarja e gushtit 2024 u cilësua si një ndër episodet më të komentuara të vitit, për shkak të përfshirjes së personazheve të njohura në rrjete sociale dhe ndikimit të saj në opinionin publik.
About The Author
