Tiranë, 22 nëntor – Sot në mbarë vendin përkujtohet Dita e Alfabetit të Gjuhës Shqipe, një nga datat më të rëndësishme për kulturën kombëtare. Kjo ditë lidhet me përfundimin e Kongresit të Manastirit, zhvilluar më 14–22 nëntor 1908, ku u mor vendimi historik për unifikimin e alfabetit të shqipes.
Kongresi mblodhi 50 delegatë nga 26 qytete, shoqata dhe klube shqiptare, të cilët shqyrtuan çështjen e shumëdebatuar të alfabetit. Pas diskutimeve të gjata, delegatët vendosën të miratojnë alfabetin latin të përshtatur, me 36 shkronjat që përdoren edhe sot në gjuhën shqipe.
Ky vendim u konsiderua një hap i rëndësishëm drejt bashkimit gjuhësor dhe kulturor të shqiptarëve dhe shërbeu si bazë për zhvillimin e arsimit në gjuhën shqipe. Njësimi i alfabetit i hapi rrugën konsolidimit të identitetit kombëtar dhe, sipas historianëve, u bë një ndër gurët themelorë që çuan drejt shpalljes së Pavarësisë së Shqipërisë në vitin 1912.
Sot, institucione arsimore, qendra kulturore dhe bashki në të gjithë vendin zhvilluan aktivitete për të nderuar këtë ditë, duke kujtuar rëndësinë e alfabetit të përbashkët në ruajtjen dhe forcimin e gjuhës shqipe.
About The Author
