Rrëshqitje masive dheu në Siçili, 1,500 banorë të evakuuar

Niscemi, Sicili – 27 Janar 2026 – Rreth 1,500 banorë të qytetit Niscemi në Sicili janë detyruar të braktisin shtëpitë e tyre pas një rrëshqitjeje masive dheu, e shkaktuar nga reshjet e dendura të sjella nga Cikloni Harry. Stuhia e fuqishme goditi Italinë jugore javën e kaluar, duke krijuar një çarje rreth 4 kilometra të gjatë në një shpat kodre, që vazhdon të zgjerohet dhe kërcënon qendrën historike të qytetit.

Kryebashkiaku i Niscemit, Massimiliano Conti, e përshkroi situatën si “dramatike” dhe bëri thirrje që banorët jashtë zonave të rrezikut të qëndrojnë në shtëpi. Autoritetet e mbrojtjes civile njoftuan se të gjitha banesat brenda një rrezeje 50–70 metrash pritet të shemben. Fatmirësisht, deri tani nuk raportohet për persona të lënduar, por dëmet materiale janë të mëdha.

Shkollat në zonë janë mbyllur, ndërsa një rrugë kryesore që lidh Niscemin me qytetin bregdetar Gela është bllokuar. Qindra banorë po strehohen në një palestër sportive, ndërsa të tjerë janë zhvendosur te familjarët.

Qeveria italiane ka shpallur gjendjen e emergjencës për rajonet jugore të prekura nga cikloni, duke vënë në dispozicion një fond fillestar prej 100 milionë eurosh. Dëmet totale në Sicili vlerësohen në rreth 740 milionë euro, por shifra mund të dyfishohet.

Autoritetet paralajmërojnë se situata mbetet e rrezikshme dhe banorët duhet të ndjekin udhëzimet e emergjencës.