Plani B për Gazën/ Një Rrip i ndarë në dy pjesë, njëra nën drejtimin izraelit
Sipas “Wall Street Journal”, SHBA dhe Izraeli po shqyrtojnë një projekt të përkohshëm të ideuar nga Jared Kushner, që synon ndarjen e Gazës në dy zona të veçanta.
Një hartë e madhe e Rripit të Gazës, e ndarë në dy pjesë, u shfaq pas Sekretarit të Shtetit amerikan, Marco Rubio — një detaj që për disa analistë është shenjë e përgatitjes së një “plani B” për rajonin.
Sipas raportimeve të The Wall Street Journal, Shtetet e Bashkuara dhe Izraeli po diskutojnë një projekt të përkohshëm që do të ndajë Gazën në dy zona të dallueshme: njëra, që përfshin rreth 53 për qind të territorit, është aktualisht nën kontrollin e ushtrisë izraelite, ndërsa pjesa tjetër mbetet në duart e Hamasit.
Në zonën e kontrolluar nga Izraeli po mendohet të nisë rindërtimi i asaj që përshkruhet si “Gazë e re” – një hapësirë ku palestinezët do të mund të jetojnë, punojnë dhe të gjejnë strehim. Sipas burimeve, projekti parashikon edhe çarmatimin e Hamasit dhe krijimin e një administrate të përkohshme ndërkombëtare që do të mbikëqyrë tranzicionin.
Ky plan, ende i pakonfirmuar zyrtarisht, synon të “ngrijë” situatën aktuale në terren, për të fituar kohë midis fazës së parë të armëpushimit dhe fazës së dytë, e cila do të përfshinte vendosjen e një force ndërkombëtare paqeruajtëse dhe tërheqjen e pjesshme të trupave izraelite nga territori.
Burime pranë diplomacisë amerikane thonë se ideja është të shmanget një vakum pushteti në Gazë pas përfundimit të luftimeve, duke ofruar një zgjidhje të përkohshme deri në gjetjen e një formule të qëndrueshme politike për rajonin.
Megjithatë, plani ka ngjallur shqetësime në disa vende arabe dhe organizata ndërkombëtare, të cilat paralajmërojnë se ndarja e territorit mund të çojë në një okupim të përhershëm të Gazës dhe në përkeqësimin e gjendjes humanitare të popullsisë palestineze.
Për momentin, as Uashingtoni dhe as Tel Avivi nuk kanë dhënë një konfirmim zyrtar mbi ekzistencën e këtij projekti, duke e lënë çështjen në nivel diskutimesh strategjike.
About The Author
