Nga nesër, kontrolle të reja në kufi për udhëtarët drejt vendeve të BE-s
Nga 12 tetori 2025, Bashkimi Europian nis zbatimin e sistemit të ri të hyrje-daljeve Entry/Exit System (EES), që do të zëvendësojë vulosjen tradicionale të pasaportave me kontrolle biometrike për qytetarët që hyjnë në zonën Schengen nga jashtë BE-së — përfshirë udhëtarët nga Mbretëria e Bashkuar dhe vendet e tjera të treta.
Si funksionon sistemi i ri
Sistemi EES do të regjistrojë automatikisht:
- Shenjat e gishtave
- Fotografinë
- Të dhënat personale të udhëtarit
duke krijuar një dosje elektronike në vend të vulës manuale në pasaportë.
Qëllimi i sistemit është rritja e sigurisë, kontrolli i qëndrimeve afatshkurtra (deri në 90 ditë brenda 180 ditëve) dhe parandalimi i imigracionit të paligjshëm.
Të dhënat do të ruhen në bazën qendrore eu-LISA, me seli në Estoni, që menaxhon informacionin nga 25 vende të zonës Schengen dhe 4 shtete të lidhura — Islanda, Lihtenshtajni, Norvegjia dhe Zvicra.
Ku do të nisë zbatimi
Në Itali, faza pilot do të nisë në aeroportet:
- Milano Linate
- Malpensa
- Roma Fiumicino
Më pas, sistemi do të shtrihet në portet e Civitavecchia dhe Gjenova, përpara se të përfshijë të gjitha pikat kufitare deri në prill 2026.
Në kufirin Shqipëri–Greqi janë duke u vendosur tashmë pajisjet e reja, të cilat do të aktivizohen të dielën, dhe pritet që në ditët e para të ketë radhë të shtuara për shkak të procedurave të reja.
Çfarë duhet të dinë udhëtarët
- Rreth 10% e udhëtarëve në fazën e parë do t’i nënshtrohen kontrolleve biometrike.
- Procedurat mund të plotësohen në kioska vetëshërbimi ose nëpërmjet aplikacioneve digjitale.
- Fëmijët nën 12 vjeç janë të përjashtuar nga marrja e gjurmëve të gishtave.
Sipas Komisionit Europian, EES përfaqëson “një hap të madh drejt një Evrope më të sigurt dhe më të digjitalizuar”, duke modernizuar mënyrën se si monitorohen hyrjet dhe daljet në kufijtë e kontinentit.
About The Author
