Aksident tragjik në Itali, humb jetën 20-vjeçari shqiptar Klaudio Gjoka
Një aksident i rëndë rrugor ka ndodhur këtë të diel në Itali, ku si pasojë ka humbur jetën një i ri shqiptar. Viktima është identifikuar si Klaudio Gjoka, 20 vjeç, me origjinë nga Lezha dhe banues në Itali.
Sipas mediave vendase, ngjarja e rëndë ndodhi në Rrugën Shtetërore 589 Saluzzo–Barge, në kilometrin e 53-të, pranë Abacisë së Stafardës. Aksidenti u shkaktua nga një përplasje e fortë mes një kamioni dhe një automjeti tip “Audi”, që drejtohej nga i riu shqiptar.
Përplasja rezultoi fatale për 20-vjeçarin, i cili humbi jetën në vendngjarje si pasojë e plagëve të rënda. Pas aksidentit, autoritetet italiane mbyllën për disa orë këtë segment rrugor, duke shkaktuar trafik të rënduar dhe kaos në zonë.
Policia dhe shërbimet e emergjencës mbërritën menjëherë në vendngjarje, ndërsa autoritetet italiane kanë nisur hetimet për të zbardhur plotësisht rrethanat dhe shkaqet e aksidentit tragjik.
About The Author
