Këtë vit, “Blue Monday”, e njohur si dita më e trishtuar e vitit, përkon me të hënën e tretë të janarit, që është pikërisht sot. Kjo ditë lidhet zakonisht me një kombinim faktorësh, si moti i ftohtë dimëror, përfundimi i festave, rikthimi në rutinën e përditshme dhe vështirësia për të mbajtur premtimet e Vitit të Ri.
Termi “Blue Monday” u bë i njohur në vitin 2005 nga psikologu britanik Cliff Arnall, i cili pretendoi se kishte krijuar një formulë për të përcaktuar këtë ditë si më të trishtën e vitit.
Megjithatë, ekspertët theksojnë se nuk ka prova shkencore që e mbështesin këtë teori. Shumë psikologë e konsiderojnë “Blue Monday” më tepër një koncept mediatik sesa një fakt real, duke argumentuar se gjendja emocionale e njerëzve nuk mund të përcaktohet nga një datë e vetme.
Pavarësisht kësaj, kjo ditë shihet si një mundësi për të reflektuar mbi shëndetin mendor, për të normalizuar ndjenjat e vështira dhe për të nxitur kujdesin ndaj vetes.
Specialistët e shëndetit rekomandojnë disa mënyra të thjeshta për ta përballuar këtë periudhë: aktivitet fizik të rregullt, ushqim të shëndetshëm me fruta, perime dhe vitaminë D, reduktim të konsumit të alkoolit, si dhe ndërveprim social me miq dhe kolegë. Po ashtu, nisja e hobeve apo projekteve të reja mund të ndihmojë në thyerjen e rutinës.
Sipas Leona Burton, eksperte e mirëqenies, vendosja e qëllimeve të qarta dhe ndarja e tyre në hapa të vegjël është çelësi për të rifituar motivimin dhe për të ruajtur një qëndrim pozitiv gjatë kësaj periudhe të vitit.
About The Author
