Tre vrasje në një ditë, ekspertët ngrenë ALARMIN: Kujdes për shëndetin mendor, shoqëria…
Zemërimi i qytetarëve në shoqërinë tonë po përkthehet në sjellje ekstreme. Këtë fatkeqësisht po e tregojnë ngjarjet e ndodhura jo më larg se një ditë më parë, ku brenda ditës pati tre viktima, si pasojë e konflikteve momentale.
Këto veprime rikthejnë vëmendjen tek shëndeti mendor, ndaj psikologia Eksena Qirici shpjegon rëndësinë e krijimit të marrëdhënieve të shëndetshme ne jetën e përditshme dhe kujdesit që duhet të kemi ndaj njëri-tjetrit.
“Çfarë do të thotë të vrasësh brenda një dite në ambiente të ndryshme, në familje, në ambientin e punës, në turizëm, në një lokal ku ti mendon se je në një situatë të qetë? Do të thotë që aspekti psikologjik, ngarkesa psikologjike, ngarkesat emocionale, kanë arritur në sistemin e mbijetesës. Po të dëgjojmë dhe të analizojmë me kujdes se çfarë autorët përmendim në arsyet e tyre të vrasjeve shihet që ka bullizëm, ka tallje, ka ofendim, ka dhunë dhe për më tepër është e vazhdueshme, është e hershme. Nëse ne në shoqëri, marrëdhënie pune, në familje, trajtojmë me dhunë psikologjike çdo lloj marrëdhënie, automatikisht kjo do të na sjellë në këto sjellje ekstreme”, thotë psikologia.
Sakaq sociologia Eris Dhamo, është e mendimit se shoqëria jone ka ndryshuar nga përqendrimi tek vlerat dhe morali drejt një shoqërie me norma të shtuara individualizmi: “Kemi individin i cili është vënë në qendër të një shoqërie dhe në këtë qendër të shoqërisë individi sot mendon në mënyrë apriori që e gjithë bota duhet të rrotullohet rreth tij, pa pasur në vëmendje ose pa qenë empatik mbi nevojat dhe domosdoshmëritë edhe të individëve të tjerë prezentë ne këtë lloj shoqërie. Nuk e vendosim asnjëherë veten në vendin e tjetrit për ti kuptuar më mirë pozicionin. Duke mos qenë empatik mjaftueshëm, komunikon përmes dhunës”.
Komunikimi është i domosdoshëm në funksionimin e një shoqërie të shëndetshme, që shmang dhunën dhe konfliktet i zgjidh me fjalë.
About The Author
