Një ngjarje e rrallë dhe e gëzueshme ka ndodhur në Spitalin Universitar Obstetrik-Gjinekologjik “Koço Gliozheni” në Tiranë, ku një nënë ka sjellë në jetë katërnjakë nga një shtatzani plotësisht natyrale.
Lajmi u bë i ditur nga Ministria e Shëndetësisë dhe Mbrojtjes Sociale, e cila e ka ndarë këtë moment të veçantë në rrjetet sociale.
“Nga familja fantastike e Rozetës dhe Geraldos, të cilët janë bekuar me katërnjakët: Roal, Alrda, Roar dhe Auro, ardhur nga një shtatzani natyrale. Jetë të gjatë vogëlushëve, të cilët pas një muaji kujdesi shëndetësor intensiv, tani janë gati për të lënë Spitalin Universitar Obstetrik – Gjinekologjik ‘Koço Gliozheni’, në Tiranë”, – thuhet në postimin e Ministrisë.
Katërnjakët, të cilët kanë ardhur në jetë në gjendje të mirë shëndetësore, kanë qëndruar për rreth një muaj nën kujdesin e mjekëve dhe infermierëve të spitalit, për t’u siguruar që të zhvillohen normalisht dhe të jenë gati për t’u kthyer në shtëpi me prindërit e tyre.
Ky është një ndër rastet më të rralla të shtatzanive natyrale në vend, duke sjellë gëzim jo vetëm për familjen e re, por edhe për gjithë stafin mjekësor të “Koço Gliozhenit”, që kujdeset çdo ditë për ardhjen në jetë të mijëra foshnjave.
About The Author
