Shkencëtarët kërkojnë ndalimin e menjëhershëm të proshutës: “Lidhet me mbi 50 mijë raste kanceri në zorrë”
Një grup shkencëtarësh britanikë po kërkon ndalimin urgjent të përdorimit të nitriteve në prodhimin e proshutës dhe “bacon”-it, duke paralajmëruar se këto kimikate lidhen drejtpërdrejt me mbi 50,000 raste të kancerit të zorrës së trashë në Mbretërinë e Bashkuar.
Sipas një analize të bazuar në të dhëna nga Cancer Research UK dhe British Journal of Cancer, konsumimi i mishrave të përpunuar shkakton çdo vit rreth 5,400 raste të reja të kancerit, ndërsa trajtimi i një pacienti kushton mesatarisht 59,000 paund. Në total, kjo ka sjellë një kosto mbi 3 miliardë paund për sistemin shëndetësor britanik gjatë dekadës së fundit.
Nitritet, “kimikatet e rrezikshme” të proshutës
Nitritet përdoren gjerësisht nga industria ushqimore për të ruajtur ngjyrën rozë dhe afatgjatësinë e produkteve të mishit. Por gjatë përpunimit dhe gatimit, ato mund të krijojnë nitrosamina — substanca të njohura për efektet e tyre kancerogjene.
Organizata Botërore e Shëndetësisë (OBSH) i ka klasifikuar këto produkte si “kancerogjene të grupit 1”, në të njëjtin nivel rreziku me duhanin dhe azbestin.
Shkencëtarët: Qeveria nuk ka vepruar
Profesor Chris Elliott nga Instituti për Sigurinë Ushqimore paralajmëroi se qeveria britanike “nuk ka bërë pothuajse asgjë për të ulur ekspozimin e qytetarëve ndaj këtyre substancave të dëmshme”.
Së bashku me kolegët e tij, ai i ka dërguar një letër Sekretarit të Shëndetësisë, ku kërkohet:
- Ndalimi i përdorimit të nitriteve në produktet e mishit;
- Paralajmërime të qarta në etiketim për konsumatorët;
- Një plan afatgjatë për zëvendësimin e tyre me alternativa të sigurta.
90% e proshutës përmban nitrite
Aktualisht, më shumë se 90% e proshutës që shitet në Britani përmban nitrite, ndërsa versionet “pa kimikate” përbëjnë vetëm 10% të tregut.
Shkencëtarët thonë se ka teknologji të reja që mund të ruajnë sigurinë dhe shijen e mishit pa përdorur substanca të rrezikshme për shëndetin.
About The Author
