Bashkësia ndërkombëtare ka shprehur gatishmërinë për të investuar 70 miliardë dollarë në rindërtimin e Rripit të Gazës, pas shkatërrimeve masive të shkaktuara nga lufta mes Izraelit dhe Hamasit.
Sipas një zyrtari të Organizatës së Kombeve të Bashkuara, Jaco Cilliers, konfliktet e dy viteve të fundit kanë lënë pas më shumë se 55 milionë ton rrënoja, ndërsa procesi i rindërtimit pritet të zgjasë dekada.
“Një numër vendesh kanë treguar tashmë se janë të gatshme të plotësojnë fondet e tyre ekzistuese për përpjekjet e rindërtimit në Gaza. Ka pasur gjithashtu diskutime me Shtetet e Bashkuara lidhur me interesin e tyre për të mbështetur rimëkëmbjen dhe përpjekjet humanitare,” deklaroi Cilliers.
Ndër vendet që kanë shprehur mbështetje për financimin përfshihen shtetet evropiane dhe arabe, si edhe Kanadaja dhe SHBA-ja.
Sipas Qendrës Satelitore të Kombeve të Bashkuara, rreth 83% e të gjitha ndërtesave në Gaza janë dëmtuar ose shkatërruar, ndërsa deri tani janë pastruar vetëm 81,000 ton rrënoja.
Cilliers theksoi se pamjet nga terreni janë tronditëse:
“Shkatërrimi që shihni në Gaza është i dhimbshëm. Është shumë e tmerrshme ta shohësh nga afër, familje që gërmojnë nëpër rrënoja për sendet e tyre, fëmijë që kërkojnë ujë dhe ushqim në vend që të jenë në shkollë. Megjithatë, qëndrueshmëria e njerëzve në Gaza mbetet e jashtëzakonshme.”
Lufta e Izraelit kundër Hamasit ka shkaktuar deri tani rreth 68,000 viktima, ndërsa komuniteti ndërkombëtar kërkon mënyra për të mbështetur rimëkëmbjen afatgjatë dhe stabilitetin humanitar në territorin palestinez.
