Luftime të ashpra mes forcave afgane dhe pakistaneze/Dhjetëra të vrarë në kufirin mes dy vendeve

Luftime të ashpra janë zhvilluar gjatë natës së kaluar në të paktën pesë zona përgjatë kufirit mes Afganistanit dhe Pakistanit, duke shkaktuar dhjetëra viktima dhe detyruar autoritetet pakistaneze të mbyllin dy pika të mëdha kufitare, njoftuan zyrtarët e të dy vendeve më 12 tetor.

Në Kabul, zëdhënësi i qeverisë së drejtuar nga talibanët, Zabihullah Mujahid, deklaroi se të paktën 58 ushtarë pakistanezë janë vrarë dhe rreth 30 të tjerë janë plagosur gjatë shkëmbimit të zjarrit. Ai shtoi se edhe pala afgane ka pësuar humbje, me 9 ushtarë të vrarë dhe 18 të plagosur në përleshjet që shpërthyen mbrëmjen e 11 tetorit.

Autoritetet pakistaneze nuk kanë konfirmuar zyrtarisht numrin e viktimave, por burime të sigurisë pranë rajonit kufitar i thanë Radios Mashaal të Radios Evropa e Lirë se tre ushtarë pakistanezë dhe një civil janë vrarë, ndërsa pesë ushtarë të tjerë janë plagosur.

Sipas të njëjtave burime, disa civilë në anën pakistaneze të kufirit kanë filluar të largohen nga rajoni drejt zonave më të sigurta, për shkak të frikës nga përshkallëzimi i dhunës.

Përplasjet mes forcave afgane dhe pakistaneze vijnë pas muajsh tensioni në kufirin e përbashkët, ku të dyja palët akuzojnë njëra-tjetrën për shkelje territoriale dhe strehim të grupeve të armatosura.